जळगाव, दि.23 (प्रतिनिधी) -
जळगाव जिल्हा क्रिकेट असोसिएशनच्या वतीने व रतनलाल सी. बाफना ज्वेलर्स प्रायोजीत व अलरीक इलेक्ट्रीकल्स सहप्रायोजकत्वाखाली आयोजित जळगाव क्रिकेट लिग-२०२६, JCL T-20 क्रिकेट स्पर्धेत आज पाचव्या दिवशी अत्यंत चुरशीच्या झालेल्या सामन्यात चाळीसगाव एसपीसीसी चॅलेंजर्स संघाने विजय मिळविला तर रावेर रॉयल्स मात्र सामन्यातून बाद झाला. सामन्यानंतर झालेल्या पारितोषिक वितरणात ओम मुंडे याला मॅन ऑफ दी मॅचने गौरविले गेले. यावेळी अमित आहुजा, ज्ञानेश्वर पाटील, अभंग जैन, कुणाल शहा, विमल जैन, प्रतिक जोशी आदी मान्यवर उपस्थित होते.
चाळीसगाव एसपीसीसी चॅलेंजर्स संघाने निर्धारित २० षटकांत ५ गड्यांच्या मोबदल्यात १८३ धावांचा डोंगर उभा केला. चाळीसगाव संघाची सुरुवात तशी बेताचीच झाली होती. लोकेश पाटील (९ धावा) स्वस्तात बाद झाला तेव्हा धावफलकावर केवळ ३६ धावा होत्या. मात्र, त्यानंतर ओम मुंडे आणि साहिल गायकर या जोडीने मैदानावर अक्षरशः धावांचा पाऊस पाडला. कर्णधार ओम मुंडेने ५६ चेंडूंत ५ चौकार आणि ५ उत्तुंग षटकारांसह ८५ धावांची खेळी करत संघाच्या डावाचा कणा मजबूत केला. त्याला साहिल गायकरने ७७ धावांची (४७ चेंडू, ९ चौकार, २ षटकार) झंझावाती साथ दिली. या दोघांनी दुसऱ्या विकेटसाठी महत्वपूर्ण भागीदारी करत संघाला १६७ धावांच्या सुस्थितीत आणले.
गोलंदाजीमध्ये केवळ यश नहार आणि संदेश सुरवाडे यांनीच प्रतिस्पर्धी फलंदाजांना काहीसा लगाम घातला. यश नहारने आपल्या ४ षटकांत ६.५० च्या सरासरीने केवळ २६ धावा देत १ बळी टिपला. संदेश सुरवाडेने टिच्चून मारा करत केवळ २ षटकांत १८ धावांच्या मोबदल्यात २ महत्त्वाचे बळी मिळवले.
*प्रमुख गोलंदाजांची स्थिती:*
धवल हेमनानी: ४ षटके, २६ धावा (किफायतशीर पण यश नाही)
कृष्णा माळी: ३ षटके, ३८ धावा (१२.६७ ची महागडी सरासरी)
आमिर खान: ४ षटके, ३३ धावा
मोहम्मद नोमान: २ षटके, २३ धावा
अखेरची षटके ठरली निर्णायक
डावाच्या उत्तरार्धात तौसिफ मिर्झा आणि अशफाक शेख या गोलंदाजांना आपल्या लय शोधता आली नाही. त्यांच्या अवघ्या काही चेंडूंवर फलंदाजांनी मोकळेपणाने हात साफ केले, ज्यामुळे चाळीसगाव संघाला १८० चा टप्पा ओलांडणे सोपे झाले.
रावेर रॉयल्सने चांगले प्रत्युत्तर देण्याचा प्रयत्न केला परंतु १० गडी गमावून १९.३ षटकात १७५ धावा काढून या सामन्यात हरले आणि सामन्याच्या बाहेर देखील झाले. यश नहार व तुषार चोरडिया यांची दमदार सुरवात झाली. चाळीसगाव एसपीसीसी चॅलेंजर्स संघाचे गोलंदाज अमेय कोळी, सरज पाटील यांनी प्रत्येकी दोन बळी घेतले तर ओम मुंडे, वकार शेख, अभि पाटील आणि लोकेश पाटील यांनी प्रत्येकी १ गडी बाद केला.
*जळगाव कोगटा किंग्सचा संघ विजयी*
टी-२० जेसीएल क्रिकेट स्पर्धेत बुधवारी रात्री झालेल्या एकतर्फी सामन्यात जळगाव कोगटा किंग्सने आपला दबदबा निर्माण केला. सलामीवीर ओम भोसले आणि जितेंद्र नाईक यांच्या झंझावाती अर्धशतकी खेळीच्या जोरावर कोगटा किंग्सने १९६ धावांचा डोंगर उभा केला. या विशाल आव्हानाचा पाठलाग करताना जामनेर सातपुडा हिरोजची फलंदाजी सपशेल अपयशी ठरली आणि संपूर्ण संघ अवघ्या ८५ धावांत तंबूत परतला.
*भोसले-नाईक यांची शतकी भागीदारी*
डॉ. राजेश पाटील आणि सीमा पाटील यांच्या प्रमुख उपस्थितीत नाणेफेक झाली. त्यात जामनेर सातपुडा हिरोज जिंकून जळगाव कोगटा किंग्सला प्रथम फलंदाजीसाठी निमंत्रित केलं. फलंदाजी स्वीकारलेल्या जळगाव कोगटा किंग्सने सुरुवातीपासूनच आक्रमक पवित्रा घेतला. सलामीवीर ओम भोसले याने मैदानावर चौफेर फटकेबाजी करत ३४ चेंडूत ८ चौकार आणि २ षटकारांच्या मदतीने ६४ धावा कुटल्या. त्याला जितेंद्र नाईक याने संयमी साथ देत ४२ चेंडूत ६४ धावा जोडल्या. या जोडीने पहिल्या विकेटसाठी १०२ धावांची सलामी देत मोठ्या धावसंख्येचा पाया रचला.
मध्य फळीत धावगती काहीशी मंदावली असली, तरी पुरवेश चौधरी (२३) आणि कर्णधार जगदीश झोपे (१७) यांनी मोक्याच्या क्षणी धावा काढल्या. जामनेरकडून ललित पाटीलने २७ धावांत ३ बळी घेत किंग्सला २०० धावांच्या आत रोखले. राम राठोडने २ तर अर्शद खानने १ गडी बाद केला.
*जामनेरचा डाव पत्त्यासारखा कोसळला*
१९७ धावांचे कठीण लक्ष्य समोर असताना जामनेर सातपुडा हिरोजची सुरुवात अत्यंत खराब झाली. ललित पाटील आणि राम राठोड हे दोन्ही सलामीवीर भोपळाही न फोडता बाद झाल्याने संघाची अवस्था १ धाव - २ बाद अशी केविलवाणी झाली. क्रीशी नाथानी (४) आणि मानस पाटील (२) हे देखील स्वस्तात माघारी परतले.
मधल्या फळीत मसूम खाटिकने २१ धावा आणि रामकृष्ण राठोडने १६ धावा करून थोडा प्रतिकार करण्याचा प्रयत्न केला, परंतु दुसऱ्या बाजूने साथ न मिळाल्याने जामनेरचा डाव १९.४ षटकांत ८५ धावांवर आटोपला.
*सागर भावरची भेदक गोलंदाजी*
जळगाव कोगटा किंग्सच्या विजयात गोलंदाजांनी मोलाची भूमिका बजावली. सागर भावरने टिच्चून मारा करत ४ षटकांत केवळ १२ धावा देत ३ फलंदाजांना बाद केले. त्याला राज बेलदार (२/२) आणि बिपिन चांगरे (२/४) यांनी अचूक साथ देत जामनेरच्या फलंदाजीचे कंबरडे मोडले. उबेद खाटिक आणि मनीष चव्हाण यांनीही प्रत्येकी एक बळी घेतला.
ओम भोसले याचा मॅन ऑफ द मॅच ने गौरविण्यात आले. यावेळी संघ मालक किरण बच्छाव, अतुल कोगटा, गौरव साफळे, ॲड. सूरज जहांगीर, हितेश मंडोरा आदी मान्यवर उपस्थित होते.
*थोडक्यात धावफलक:*
जळगाव कोगटा किंग्स: २० षटकात १९६/८ (ओम भोसले ६४, जितेंद्र नाईक ६४; ललित पाटील ३/२७)
जामनेर सातपुडा हिरोज: १९.४ षटकात ८५/१० (मसूम खाटिक २१, रामकृष्ण राठोड १६; सागर भावर ३/१२, राज बेलदार २/२)
